Limburgdàg. Vandaog is ’t den negetienden april. Vur veul minse is da nen dàg lek nen anere. Mar toch is dezen dàg ne spisjaole vur toch wa Limburgers. Want d’r zen èègelijk twieë Limburge: ieën aon deze kànt vanne Maos én ieën aon géne kànt vanne Maos.
Vruger ôp school hömme wélle gelierd dat ‘et Bels ôp z’n ège begôst in (1830) àchtienhônnerd-dettig. Willem I (den ieëste), keuning der Nederlanden (nèè Bels én Hôlland), wien aonne kànt geschove in ’t Bels. Mee ‘et Verdràg van Londen in (1839) wien Limburg ôpgesplitst in twieë stukken: aon deze kànt vanne Maos wien ‘et “Belgisch-Limburg” mee Hasselt as hoofdstad. Aon den anere kànt wien ‘et “Nederlands-Limburg” mee Maastricht as hoofdstad.
Da Limburg in twieë verdeeld wien, war en pôlletieke beslissing bove de koppe vanne minse. As ’t van Franz Corneli én z’n kômpaone had àfgehànge, war da nie gebeurd. Franz Corneli war burgemieëster van Kerkrade, zoot inne Provinciale Staten, war ok nog vôlksvertégewoordiger in den tèèd van ’t Bels bestuur euver Limburg, war ok aktief inne Twieëde Kaomer (Hôllands bestuur). Saome mee en aontal veuraonstaonde minse war hè van ’t gedacht ôm en zoeë zelfstàndig meugelijk Hertogdom Limburg te maoke. Mee ne milletèren ingreep van Hôllandse kànt, wien da teniet gedaon.
As ge vandaog en bikke nao de ràdjo löstert, zulder huuëre da t’r lings én rechs toch wa aondàcht gegéve wönt aon die splitsing: ozze goevernäör, in Mazèèk, in Kan,…
De kômpleménte, Gust Caole/Caelen (info öt : Franz Corneli (1800-1855) parlementariër, en het streven naar staatkundige zelfstandigheid voor Limburg - Lei Heijenrath - Stichting Historische Kring Het Land van Herle, ISBN 978-90-82241-1-7)
Apropoo: veur mieër plat Héppes, komt dan nèè zôndag tusse twieë én vèèf uur nao ’t muzeejum van Heemkunde Heppen vur Erfgoeddag (in de voormalige pastorie - Pastoor Aertsstraat 7 in Heppen).